البوابةالرئيسيةس .و .جبحـثالتسجيلدخول





شاطر | 
 

 الأمل......موجود أم أنعدم؟؟؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أبوحفص
عضو نشيط
عضو نشيط


عدد الرسائل : 82
العمر : 28
محل الاقامة : في ارض الله الواسعه
الوظيفة : طالب عفو ربه
تاريخ التسجيل : 18/07/2008

مُساهمةموضوع: الأمل......موجود أم أنعدم؟؟؟؟   الإثنين 04 يناير 2010, 9:28 pm



احبتي في الله :

في احدي المنتديات الطبيه كتب احد الأعضاء هذا الموضوع

(كلما
قرات اغلب المشاركات في المنتدى الطبى كاما وجدت نفسي حائرا.فهذه مجموعه
من خير شباب الامة وعلى ثغرة من اهم ثغورها..لا تعلم قيمةنفسها ولا قيمة
ما تفعله في الحياة..اكاد اراها ظاهرة في كتابات كل الاخوة والاخوات..اللي
في الكلية مهموم واللي في الامتياز مهموم واللي في النكليف مهموم واللي
جاتله النيابه مهموم واللى ما جاتلوش برضه مهموم..
يا جماعه انتم نا قصرتوش ..انتم عملتم اللي عليكم واكتر..ذاكرتم اجتهدتم
دخلتوا الكليات اللي عايزينها..مكتب التنسيق ما فرضش عليكم كلياتكم..ليه
الاحباط دا دلوقتي..ليه حاسين ان دايما فيه مشكله..رغم ان هو هد الطريق
العادي..اللي كلنا ماشيين فيه..علشان نوصل..الطبيعى ان الجامعه كانت
مرحلة..ودلوقتي الشغل دا مرحلة وكل مرحله والله ليها جمالها وليها
متعتها..ليه دايما مصرين نبص لنص الكبايه الفاضى
انا فكرت نعمل مبادرة بسيطه هيا يوم للامل..يوم نتفق عليه كل واحد يكتب
قصة نجاح حصلتله في حياته..نجاح دراسي شخصى اي حاجه..يوم ما نفتكرش فيه
غير كل شئ حلو..لا نفتكر مدير سئ ولا شغل سئ ولا فلان ما بيراعيش
ظروفى..يوم كل اللي يدخل المنتديات الطبيه ما يلاقيش غير قصص نجاح..كلنا
نفتخر بانفسنا...نشحذ الهمة..ما نسمعش فيه ولو كلمة واحده سلبية..كل
المشاركات تبقى ايجابية وكلها مليانه نجاح وتفاؤل واحلام
طبعا انا هاترك تحديد اليوم للمشرفين د اسماء ود عمرو جزاهم الله خيرا
وياريت الاقى كل المنتدى متحمس للفكرة..يوم للامل ..يوم بلا كلمة سلبية..يوم مافيش فيه غير الرضا النفسي..مستنى افكاركم لليوم دا)
وبعد فتره كان هذا رد احدهم

([size=21]حدثوني عن الامل....
أتذكرون ذلك الاداء الرائع للراحل محمود المليجي في فيلم"اسكندرية لية"
في الفيلم كان هناك شاب متهم بجرمة سياسية خطيرة وكانت نتيجة محاكمته معروفة للجميع مسبقا
الكل يعلم ان الحكم عليه سيكون مشددا جدا
"ومن باب الشكليات فقط عينت له المحكمة محامى"لعب دوره محمود المليجي
في زنزانته التقي الشاب بمحمود المليجي الذي قال له:
انا المحامي الذى عينته لك المحكمة عشان ادافع عنك في قضيتك
:فقال له الشاب
وتفتكر هتكسبها؟
هنا ابتسم المليجي ابتسامة ساخرةخفيفة و ارتفع صوته وهو يقول:
بص حواليك كده000000
البلد الغنى فيها بيزداد غني والفقير يزداد فقر
وعاوزني اكسبها؟!؟!؟
شركة المواصلات بترفع سعر التذكرة على الفقراء
عشان تعمل يا نصيب والجايزة تكون سيارة
وعاوزني اكسبها؟!؟!؟
وأخذ يقص له الكثير من اخطاء وتناقضلت المجتمع المتفسخ وان فساد محاكمته جزء من فساد المجتمع
وانه ما جاء الا للشكليات
وفي كل مرة ينهي كلامه بهذا السؤال البديع :
وعاوزني اكسبها؟!؟!؟

اله يرحمك يامليجي

وأنا هنا هاعمل نفسى محمود المليجي وأسأل:

تحرم نفسك من كل شئ لتحصل علي مجموع عالي في الثانوي
وتحرم نفسك من كل متع الحياةالتي يفعلها اقرانك من الشباب بينما انت غارق في ست
سنوات عجاف في الكلية
وبعد ذلك يكون مرتبك 143 جنيه
وعاوزني اكسبها؟!؟!؟

تمضى انت وزملائك سنة امتياز طويلة
بينما تتطايرفتيات احلامكم امام عيونكم
يخطفهم العرسان اللقطة الجاهزين
وانتم غارقون في السؤال السرمدي
هل يكفي المرتب لآخر الشهر؟
وعاوزني اكسبها؟!؟!؟

عندما تقضي سنتين أطول كطبيب تكليف في مجاهل الريف المصري السعيد جالسا في وحدة صحية
طويلة عريضة
يغادرها كل العمال والتمريض في الثانية ظهرا
وتبقي انت وحيدا في هذه القلعة
تذاكر
تكتب خواطرسوداوية غالبا
ورقيقة احيانا
تشاهد التلفاز او تقرا الصحف التي يحضرها لك العامل من المدينة التي علي بعد كيلومترات كثيرة
او تنتحر
او تصاب بالجنون
وعاوزني اكسبها؟!؟!؟

لما هواياتك تضمحل واحدة بعد الثانية وتلاقي نفسك بتكتب خطف
وبتقرا خطف
وبترسم خطف
وكل ما تقابل دكتور احمد خالد توفيق
"طبيب و اديب"
تلاقيه محبط كطبيب
ومحبط كأديب
وعاوزني اكسبها؟!؟!؟

لما تستلم نيابتك وتلاقي حالة جالها arrest
وهتموت ادام عينيك عشان المستشفي مفيهاش امبول اتروبين بربع جنية
وعاوزني اكسبها؟!؟!؟

لما شقتك التمليك مش عاجبة العروسة عشان أوضتين وبعيدة عن ماما
ويوم ورا يوم بتلاقي كتير من احلامك بتنتقل من خانة
"احلام مؤجلة"
الي خانة
"احلام شبه مستحيلة"
وتسأل نفسك كل لحظة:هو أنا قاعد ليه في البلد دي؟
مستنى آخد دبلومة أو ماستر وأهج من البلد دي
وعاوزني اكسبها؟!؟!؟

لما تقترب رسوماتك من عالم النشر
وتكون المفاجأة بضآلة العائد المادي لنشر الرسوم في مصر مقارنة بالخليج
مش هاقول فرنسا أو بلجيكا
وتلاقي اسامي كبيرة جدا في عالم الرسم في مصرزي "حجازى"
اعتزل وقاعد في بيتهم قرفان
أو"ميشيل معلوف"اللي قرف من حال الرسم في مصر وراح فتح مطعم سمك!!
وعاوزني اكسبها؟!؟!؟

أما تلاقي أستاذك في الطب راجع من السعودية بعد ما قضى 10 سنين هناك
وما كملش سنة في مصر وقرفان وعاوز يرجع تاني السعودية لأن العمل الطبي هنا
غير مجزي ماديا أو معنويا
أكيد البلد اللي فيها الدكتور زهقان
والأديب زهقان
و الرسام زهقان
أكيد البلد دي فيها مشكلة
ومشكلة كبيرة كمان
وعاوزني اكسبها؟!؟!؟

لما تلاقي نفسك كل يوم في معضلة اما أن تموت من الجوع
أو تشتغل نصاب أو تسافر
وعاوزني اكسبها؟!؟!؟

لما تجاهد كل يوم تكون انت نفسك وتحتفظ بروحك الساخرة
ووجهة نظرك رغم كل القرف ده
وعاوزني اكسبها؟!؟!؟
---------------------------------
أخي العزيز dr dreamerاسمح لي ان اقتبس بعض كلماتك التي قلتها انت في موضوع اخر علي منتدانا
أنت قلت:
نعمل لساعات طويله لكننا في ذات الوقت نحصل على دخل عالى وسيارة حديثه ورحلات داخل وخارج مصر
وعاوزني اكسبها؟!؟!؟

ربنا يباركلك ويزيدك
أنا لا أحقد عليك
لكن ليس من الفروسية اطلاقا أن تتمتع انت بكل هذا وتطالبنا نحن الكادحون بالصبر
أنا متأكد من حسن نيتك لكن ألم يكن من الأوقع أن تأتي الدعوة للأمل من أحد الكادحين؟
مش مقنع خالص أن تطالبنا أنت ياصاحب
الدخل عالى والسيارة الحديثه والرحلات داخل وخارج مصر بالأمل
واننا نكسبها!!!
ولكن علي العموم اشكرك لاتاحة هذه الفرصة للكلام
أو الفضفضة
بس تخيل بقي اني باحاول أكسبها
مع كل القرف ده كان عندي حل من اتنين:

الحل الاول
اني أقعد أبكي حالي وظروفي
وده حل سهل ولذيذ
ومش متعب اطلاقا

الحل التاني
يكون عندك اولا اقتناع تا م انك صح
وبعد كدة اشتغل بايديك وسنانك لتغيير نفسك وظروفك للأفضل
ذاكر
اشتغل
اقرأ
اتصرف
دي مشكلتك
واقعد مع نفسك كل شويه و الثانية وشوف
انت لسه ماشى صح ولا لأ
أي نعم هو طريق صعب وطويل ومليان بلاوي زرقه
بس مفيش أدامك غيره-علي افتراض ان مالكش فى طريق النصب-
علي الأقل طريق الكفاح يعدك بثمرة في النهاية
بينما طريق البكاء لن يعطيك أي شئ
وكل ذوخبرة بالحياة يعلم أن لا شئ يأتي بسهولة
مفيش د هاييجي يحط أيده علي كتفك ويقول لك:
أنت دكتور كويس..طيب القلب نقي السريرة
هنيئا لك الفيلا والسيارة والحسناء
الحاجات دي مابتحصلش الا في الف ليلة وليلة بس
ده طبعا لو افترضنا ان الف ليلة وليلة فيها عربيات وفلل

لسه الدنيا غامقة..مش كده؟
قول قول..أنا حاسس بيك
بس أنا عندي كام طريقة مجربهم باحاول أتغلب بيهم على الدنيا الغامقة دي:

الطريقه الأولي

ودي قريتها زماااااااااااان في مقالة لماما لبني في مجلة سمير
وكانت تعتمد ببساطة ان لوجالك احباط من أى حاجة
هات ورقة وقلم
وقسم الورقة نصين
واكتب في النص الاول كل اللي مزهقك في الدنيا
وفي ا لنص التاني
نعم ربنا الكتييييييييييييرة عليك
جرب كده وهتلاقي في كا مره ان نعم ربنا اكتر بكتييييييييييير من أي حاجه مزهقاك

الطريقة الثانية

ودي بقي من منجزاتي أنا علي رأى عبد الفتاح القصري
ببساطة أنا عامل قائمة
جبت ورقة كبيرة وكتبت فيها عنوان كبير اسمه
هؤلاء الأشخاص يجعلون الحياة أفضل
وباسجل في القائمة دي من وقت للتاني الأشخاص المميزين اللي باقابلهم أو أعرفهم في حياتي
الناس الناجحة في الحياة
مع التزام ديني وأخلاقي عميق
وتصالح مع النفس
كلما زادت الأسماء في هذه القائمة
زاد اقتناعي اننا
ممكن نكسبها
القائمة كبيرة لحسن الحظ وتزيد باستمرار
يبدو ان فيه أمل
وتضم بعض زملاء الراسة والعمل
وبعض أساتذتي من أول المرحلة الأبتدائية حتي الجامعة
و أشخاص من خارج مجال العمل والدراسة
وأشخاص التقيت بهم مرة واحدة ولكن تأثيرهم كان عميقا
وأشخاص لم أعرفهم شخصيا ولكن عرفتهم علي صفحات الكتب
أو عبر وسائل الأعلام

الطريقة الثالثة

وهي أهم بكثير جدا جدا جدا من كل ما سبق
نحن كمسلمون مؤمنون بأن الله حق والقرآن الكريم حق
ينبغى أن ندرك جيدا أنه
لا ييأس من روح الله الا القوم الكافرون
وفي رأيى المتواضع أن الأمل والتفاؤل وعدم اليأسهي أشياء من صميم العقيدة
وأتذكر هنا عبارة قرأتها في كتاب" نجيب محفوظ" الرائع"أصداء السيرة الذاتية"
وفيها يسأل أحدهم الشيخ عن الكفر فيقول له تلك الجملة الرائعة:
"الكفر هو الضجر"

أد ايه جميلة الجملة دي
الكفر هو الضجر
فعلا
الضجر هو الزهق أو القرف بلغتنا
ومن يشعر بهذا أظن أن مفهوم الأيمان بالقضاء و القدر خيره و شره قد اهتز لديه
وهو من أسس العقيدة الاسلامية كمايعلم الجميع

ان هو الأمل ولاشئ سواه
ليست كلمة تقال بأريحية في محادثة جميلة
انما هي حياتنا كده
وربنا عاوزنا نعيشها كده
واللي عاوز الراحة الخالصة والسعادة الحقيقية
فهي في الجنة ان شاءالله
وليس علي أرضنا
أرض الخطايا
رزقنا الله واياكم الجنة
شكرا لصاحب الفكرة
ولكل من شارك ويشارك فيها
وتحياتي لكل أعضاء المنتدي وزواره)[/size]

هل حقا الأمل موجود كما قال الاول ام انه انعدم ؟؟؟؟؟؟
وهل الأمل لايتواجد الا بتواجد المرتب العالي والسياره الفارهه والزوجه الجميله كما حدث مع الأول ؟؟؟
وهل بعد ان علمنا مشاق هذا الطريق كما رأيناها وحكيت لنا من زملائنا الذين عاشوها نتمني ان يعود بنا الزمان فنغير رأينا؟؟؟
وهل صعوبه الظروف والأحوال المترديه من حولنا تدفعنا للتخلي عن الأمل؟
اسئله كثيره وكثيره تحتاج الي اجابه منا قبل ان ان نأخذ الخطوات الجديه في حياتنا فهل فكرت فيها ؟
وفي النهايه اعتذر عن الأطاله ولكنه موضوع اثار افكاري من كثره ماسمعت المتحدثين فيه وايضا لأنتشار فريق من المثبطين والمحبطين بيننا همهم الأول كسر عزائمنا فأردت أن أري الي أي حد وصل هذ الفيروس بيننا

والسلام عليكم ورحمه الله وبركاته
الرجوع الى أعلى الصفحة اذهب الى الأسفل
http://www.rslan.com
 
الأمل......موجود أم أنعدم؟؟؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
Kollia Online Forums :: . :: حالة حوار-
انتقل الى: