هتعيش ازاي ..؟

بسم الله الرحمن الرحيم

اولا كل سنه وانتوا طيبين ..
عيد سعيد علينا كلنا ان شاء الله
__

ندخل في الموضوع ..
كل انسان فينا يعيش في بيئته..

والبيئه هي كل ما يحيط بالانسان ..ليتأثر به ويؤثر فيه ..

من المكونات الاساسيه للبيئه اللي احنا فيها .. اخوك الانسان ..

يعني اصحابك وعايلتك وحتى الناس العاديه اللي بتقابلها صدفه في حياتك ..

اللي مش بارادتك ..
هتتأثر بيهم ..و كمان المفروض هتؤثر فيهم
سلبيا ..او .. ايجابيا ..!!
ومحدش فينا بيختار ..
هوا هيتولد في الدنيا هيعيش مع مين ويقابل مين .. ويتعامل مع مين ..
يعني انت مش هتختار كل الناس اللي في حياتك ..بمزاجك ..
و بيتهيئلي ....
ان تعامل الناس مع بعضها من اصعب الحرف ..اللي صعب على أي حد انه يتقنها تماما ..

بمعنى انك عمرك ما هتكون متفاهم ومتواصل مع كل اللي حواليك ..
ماهو صوابع ايديك مش زي بعضها ...

والناس اشكال والوان ..

اللي انا عايزه اسأله ..

لو قدِر ليك ..انك تكون متواجد وسط مجموعه من الناس ..
و لأي ظرف كان .. مش متفاهم معاهم ..
بالافعال ..بالاقوال .. طريقه التفكير ..او أي سبب تاني ..

يا ترى هتتصرف ازاي ..؟
هتعيش معاهم بأي اسلوب ..؟؟

هتحاول تشكل الناس دي وتظبطهم في تعاملاتهم معاك على مقاسك ..
- بمعنى انهم يعاملوك زي مانت عاوزهم يعاملوك ..
وميخرجوش عن القاعده دي ..
في الحدود اللي تقدر تتفاهم معاهم فيها وبس ..
اما الحاجات التانيه متعاملهمش فيها ..

وأعتقد ساعتها يبقى انت مبتتعاملش معهم بطبيعتهم ..
ومش بتكسبهم كأشخاص حقيقين قريبين منك ..
لانك ساعتها هتكون بتتعامل مع جزء ومش انسان كامل ..

- او هتحاول تغيرهم للنموذج اللي انت حابب تتعامل و تتفاهم معاه
يعني تلغي شخصيه واحد .. وتدفعه للتغيير ..
لمجرد انك شايف من وجهه نظرك ..
انه كدا هيبقى احسن ..
و متهيئلي دا هيبقى نوع من الانانيه ..
لانك ساعتها هتبقى مش شايف غير نفسك وبس ..
و مش شايف اللي قدامك ولا عارف هوا عاوز ايه ..؟
ولا محترم حقه في انه يكون ليه حياته وشخصيته المستقله اللي هوا يختارها ..بنفسه ..

ولا هتتعامل معاهم زي ما هم ..
و ساعتها هتظبط نفسك انت على مقاسهم ..
وتيجي على نفسك وتستحمل وتعدي ..
وتلغي شخصيتك وسطهم ..وساعات كمان تضطر تمثل و تبين حاجات فيك على غير حقيقتها ..
عشان تبقى واحد تاني ..ماشي مع الناس اللي حواليه ..ومتفاهم معاهم ..
بس عشان متبقاش مختلف وغريب عن الباقي ..
وتبان انسان عادي وسطهم ومنهم ...

ولا هتشتري دماغك ..وتنطوي على نفسك ومتتعاملش معاهم اصلا ...
عشان متبقاش لا منهم ولا عليهم ..
وساعتها هتخسر الناس اللي حواليك اصلا ..
وتبقى لوحدك ...؟

ولا في حلول تانيه ..
انتو ايه رأيكم ..